திருப்பரங்குன்றம் கார்த்திகை தீபம் தொடர்பான இரு செய்திகள்

-ஆசிரியர் குழு

வரும் நவ. 24ஆம் தேதி திருப்பரங்குன்றம் மலையுச்சியில் நீதிமன்ற உத்தரவுப்படி கார்த்திகை தீபம் ஏற்றப்பட வேண்டும். தீப நாள் நெருங்கும் நிலையில், தமிழகத்தை ஆளும் தவெக அரசு முந்தைய திமுக அரசு போலவே மக்களை ஏமாற்றும் முயற்சிகளில் ஈடுபட்டிருக்கிறது. இது தொடர்பான இரு பத்திரிகைச் செய்திகள் இங்கே…

திருப்பரங்குன்றம் கோயிலை

தொல்லியல் துறை கட்டுப்பாட்டின் கீழ் கொண்டு வரக் கூடாது:

உச்ச நீதிமன்றத்தில் தமிழக அரசு எதிர்ப்பு

புதுதில்லி/சென்னை: திருப்பரங்குன்றம் கோயில் மற்றும் மலையை தொல்லியல் துறை கட்டுப்பாட்டின் கீழ் கொண்டு வர வேண்டும் என்ற கோரிக்கையை நிராகரிக்க வேண்டும் என உச்ச நீதிமன்றத்தில் தமிழக அரசு தெரிவித்துள்ளது.

திருப்பரங்குன்றம் முருகன் கோயிலுக்குச் சொந்தமான மலை உச்சியில் உள்ள தீபத்தூணில் ஒவ்வொரு ஆண்டும் கார்த்திகை தீபத் திருநாளன்று தீபம் ஏற்ற அனுமதி அளித்து சென்னை உயர் நீதிமன்ற மதுரை கிளையின் தனி நீதிபதி ஜி.ஆர். சுவாமிநாதன் உத்தரவிட்டிருந்தார். மேலும் தொல்லியல் துறையினர் அனுமதியோடு கோயில் நிர்வாகம் தரப்பினர் தீபம் ஏற்ற வேண்டும் என உத்தரவிட்டிருந்தார். தனி நீதிபதி பிறப்பித்த உத்தரவை சென்னை உயர் நீதிமன்ற மதுரைக் கிளை அமர்வும் உறுதி செய்தது.

இந்த உத்தரவுக்கு எதிராக கோயில் நிர்வாகம், தமிழக அரசு, தர்கா நிர்வாகம் தரப்பிலும், அதேபோல தீபம் ஏற்ற பொதுமக்களை அனுமதிக்க மறுத்ததை எதிர்த்து ராம. ரவிகுமார் என்பவரும் உச்ச நீதிமன்றத்தில் மேல்முறையீடு செய்த நிலையில், அந்த மனுக்களின் மீதான விசாரணை நிலுவையில் இருந்து வருகின்றது.

அதேவேளையில், ஹிந்து தர்ம பரிஷத் என்ற அமைப்பு சார்பில் அதன் நிர்வாகி கே.கே.ரமேஷ் என்பவர் தாக்கல் செய்த ரிட் மனுவில், “திருப்பரங்குன்றம் கோயில் மற்றும் அதனைச் சுற்றியுள்ள மலைப்பகுதியை தொல்லியல் துறை கட்டுப்பாட்டின் கீழ் கொண்டு வர வேண்டும், 24 மணி நேரமும் கோயிலில் உள்ள கல் தூணில் தீபம் ஏற்றப்பட வேண்டும். கார்த்திகை திருநாளின்போது மலையைச் சுற்றி முழுவதும் தீபம் ஏற்ற வேண்டும்” என கோரியிருந்தார், அந்த மனுவை விசாரித்த உச்ச நீதிமன்றம் தமிழக அரசு பதிலளிக்க நோட்டீஸ் பிறப்பித்திருந்தது.

அதன் அடிப்படையில் இந்து சமய அறநிலையத் துறை ஆணையர் டி.ஜி.வினய் சார்பில் தாக்கல் செய்யப்பட்டுள்ள பதில் மனுவில் கூறியிருப்பதாவது:

திருப்பரங்குன்றம் கோயில் மற்றும் முழு மலையின் உரிமை தொடர்பாகத் தாக்கல் செய்யப்பட்ட வழக்கில், கடந்த 1923-ஆம் ஆண்டு பிறப்பிக்கப்பட்ட தீர்ப்பின்படி மலையின் முழுமையான உரிமை கோயிலுக்குச் சொந்தமானது என்பது திட்டவட்டமாக உறுதிப்படுத்தப்பட்டு சட்டப்பூர்வமாக நிலைநிறுத்தப்பட்டுள்ளது.

மேலும், மலையில் உள்ள சில குறிப்பிட்ட பகுதிகள் மற்றும் நெல்லித்தோப்பு தொடர்பான எல்லைகள் வழக்குகளின் மூலம் முறையாக அளவீடு செய்யப்பட்டு வரையறுக்கப்பட்டுள்ளன. கடந்த 150 ஆண்டுகளுக்கும் மேலாக, ஆகம விதிகளின்படியும், கோயில் பரிந்துரைகளின்படியும், கோயில் பகுதிக்கு அருகில் உள்ள தீப மண்டபத்தில்தான் கார்த்திகை தீபம் ஏற்றப்பட்டு வருகிறது.

மேலும், கடந்த 1996-ஆம் ஆண்டு சென்னை உயர் நீதிமன்றம் பிறப்பித்த உத்தரவின்படி, கோயில் தேவஸ்தானம் மட்டுமே பாரம்பரியமான இடத்தில் தீபம் ஏற்ற வேண்டும் என்றும், வேறு எங்கும் தன்னிச்சையாகத் தீபம் ஏற்றுவது தடை செய்யப்பட்டுள்ளது என்றும் தெளிவுபடுத்தியுள்ளது.

எனவே, திருப்பரங்குன்றம் மலைப் பகுதியிலும் சுற்றியுள்ள இடங்களிலும் நிலவும் மத நல்லிணக்கச் சூழலைப் பாதுகாக்கவும், எந்தவிதமான வகுப்புவாத மோதல்களும் ஏற்படாமல் தடுத்து பொது அமைதியைக் காக்கவும் மாநில காவல்துறையும், மாவட்ட நிர்வாகமும் மட்டுமே முழுப் பொறுப்புடன் செயல்பட்டு வருகின்றன.

கோயில் மற்றும் முழு மலையையும் இந்தியத் தொல்லியல் துறையின் கட்டுப்பாட்டிற்கு மாற்ற வேண்டும் என்ற கோரிக்கை முற்றிலும் சட்டத்திற்குப் புறம்பானது.

திருப்பரங்குன்றம் கோயிலில் பூஜைகள் ஆராதனைகள் மற்றும் தீபம் ஏற்றும் அனைத்து உரிமையும் கோயில் நிர்வாகத்துக்கு உரியது, எனவே மனுதாரரின் கோரிக்கைகளை நிராகரித்து, மனுவை அபராதத்துடன் தள்ளுபடி செய்ய வேண்டும் என்று இந்து சமய அறநிலையத் துறை ஆணையர் சார்பில் உச்ச நீதிமன்றத்தில் வலியுறுத்தப்பட்டுள்ளது.

நன்றி: இந்து தமிழ்திசை (14.11.2026)

$$$

திருப்பரங்குன்றம் தீபத் திருவிழா: சி.ஆர்.பி.எஃப். பாதுகாப்பு கோரி மனு

புதுதில்லி: திருப்பரங்குன்றம் முருகன் கோயில் மலை உச்சியில் உள்ள தீபத் தூணில், பக்தர்கள் பாரம்பரிய முறையில் தீபம் ஏற்றுவதை உறுதிசெய்யும் வகையில், அப்பகுதியில் சி.ஆர்.பி.எப்., பாதுகாப்புக்கு உத்தரவிடக் கோரி உச்ச நீதிமன்றத்தில் இடைக்கால மனு தாக்கல் செய்யப்பட்டுள்ளது.

‘ஹிந்து தர்ம பரிஷத்’ அமைப்பின் சார்பில், அதன் நிர்வாக அறங்காவலர் கே.கே.ரமேஷ் தரப்பில் தாக்கல் செய்யப்பட்டுள்ள மனு:

வரும், 24-ஆம் தேதி, திருப்பரங்குன்றம் மலை உச்சியில் ஆண்டுதோறும் நடக்கும் பாரம்பரிய தீப ஆராதனை திருவிழா கொண்டாடப்பட உள்ளது. மலை உச்சியில் உள்ள பாரம்பரிய தீபத்தூணில் பக்தர்கள் தீபம் ஏற்றுவதற்குத் தடை விதிக்கக் கூடாது என்றும், அதற்கு அனுமதி அளிக்க வேண்டும் என்றும் சென்னை உயர் நீதிமன்றத்தின் தனிநீதிபதி உத்தரவிட்டிருந்தார்.

இதை எதிர்த்து மாநில அரசு தாக்கல் செய்த மேல்முறையீட்டு மனுவை தள்ளுபடி செய்த உயர் நீதிமன்ற இரு நீதிபதிகள் அமர்வும் தனி நீதிபதியின் உத்தரவை உறுதி செய்தது. உயர் நீதிமன்ற உத்தரவை எதிர்த்து உச்ச நீதிமன்றத்தில் தமிழக அரசு தரப்பில் மனு தாக்கல் செய்யப்பட்டுள்ளது. எனினும், உயர் நீதிமன்ற உத்தரவு மீது, உச்ச நீதிமன்றம் இடைக்காலத் தடை விதிக்கவில்லை.

இதன் அடிப்படையில், சென்னை உயர் நீதிமன்றம் குறிப்பிட்ட மலை உச்சியில் தீபம் ஏற்றலாம். ஆனால், அரசியல் காரணங்களுக்காக உள் நோக்கத்துடன் மாநில அரசு அதிகாரிகள் தீபம் ஏற்றுவதை தொடர்ந்து தடுத்து வருகின்றனர்.

எனவே வரும், 24இல் நடக்கவுள்ள தீபத் திருவிழாவின் போது பக்தர்கள் அமைதியான முறையில் வழிபாடு நடத்தவும், சட்டம் – ஒழுங்கு பிரச்னைகளை தவிர்க்கவும், மாநில போலீசை மட்டும் நம்பியிருக்காமல் திருப்பரங்குன்றம் முருகன் கோயில் மற்றும் மலைப்பகுதிகளில் மத்திய ரிசர்வ் போலீஸ் படையை பணியில் ஈடுபடுத்த உத்தரவிட வேண்டும்.

இவ்வாறு மனுவில் கோரப்பட்டுள்ளது.