-திருநின்றவூர் ரவிகுமார்
நவராத்திரி, விஜயதசமியை முன்னிட்டு தேவி வழிபாடு இங்கே இடம்பெறுகிறது. இது இரண்டாம் நாள்…
2. பிரம்மசாரிணி
த³தா⁴னா கரபத்³மாப்⁴யாம க்ஷமாலாகமண்ட³லூ | தே³வீ ப்ரஸீத³து மயி ப்³ரஹ்மசாரிண்யனுத்தமா || ..2..
பொருள்: வலது கரத்தில் ஜபமாலை, இடது கரத்தில் கமண்டத்தையும் ஏந்தி நிற்பவள், அனைத்து தெய்வங்களிலும் ஒப்பற்றவளான பிரம்மசாரிணி தேவியே! என்மீது அருள்புரிவாளாக.
துர்கையின் ஒன்பது வடிவங்களில் இரண்டாவது அவதாரம் பிரம்மசாரிணி.
இங்கே ‘பிரம்மம்’ என்பது தபஸ் (தவம்) என்ற அர்த்தத்தில் வருகிறது. அதனால் பிரம்மசாரிணி என்பது ‘தவம் செய்பவள்’ என்று பொருள். வேதத்தில் – “वेदस्तत्त्वं तपो ब्रह्म” – வேதம், தத்துவம், தவம் ஆகியவை அனைத்தும் பிரம்மம் என சமமாகக் கொள்ளப்படுகின்றன.
அவள் உருவம் பிரகாசமாகவும், அதீத மேன்மையுடனும் விளங்குகிறது. வலது கையில் ஜபமாலை, இடது கையில் கமண்டலத்தையும் ஏந்தியவள்.
ஹிமவான் மகளாகப் பிறந்த போது, நாரத முனிவரின் உபதேசத்தால் சிவபெருமானைக் கணவராகப் பெறும் குறிக்கோளுடன் கடுமையான தவம் மேற்கொண்டாள். ஆயிரம் ஆண்டுகள் பழங்கள், கிழங்குகள் மட்டுமே உண்டு தவம் செய்தாள்; நூறு ஆண்டுகள் கீரைகள் மட்டுமே உண்டு வாழ்ந்தாள்.
சிலகாலம் முழுமையாக உண்ணாமல், மழை, வெயில், பனி போன்ற இயற்கையின் துன்பங்களைத் தாங்கினாள்; மூன்றாயிரம் ஆண்டுகள் தரையில் விழுந்த உலர்ந்த பில்வ இலைகள் மட்டுமே உண்டு வாழ்ந்தாள். அதன்பிறகு அதையும் கைவிட்டாள்.
ஆயிரக்கணக்கான ஆண்டுகள் அன்னம், தண்ணீர் எதுவும் இல்லாமல் தவம் செய்தாள். பில்வ இலைகளையும் உண்ணாமல் விட்டதால் அவள் அபர்ணா என்ற பெயரால் அறியப்படுகிறாள்.
இத்தகைய கடுமையான தவத்தால் அவள் எலும்புக்கூடு போல மெலிந்து போனாள். அதை கண்ட தாய் மேனா கவலைப்பட்டு, “உ…மா” (அப்படிச் செய்ய வேண்டாம், வேண்டாம்) என்று சொன்னார். அந்தச் சொற்றொடரால் அவள் ‘உமா’ எனவும் அறியப்படுகிறாள்.
அவளது தவத்தின் வலிமையால் மூன்று உலகங்களிலும் கலக்கம் ஏற்பட்டது.
அனைத்து தேவர்கள், முனிவர்கள், சித்தர்கள் என்று அனைவரும் அவளை வியந்து புகழ்ந்தனர். அப்பொழுது பிரம்மா தேவனால் ஓர் அசரீரி வாக்கு எழுந்தது:
“அம்மையே, இதுவரை யாரும் இப்படிப்பட்ட கடினமான தவம் செய்ததில்லை. உங்களால்தான் சாத்தியம். இந்தச் சிறப்பான செயல் எங்கும் புகழப்படுகிறது. உமது விருப்பம் நிறைவேறும். சிவபெருமானே உமது கணவர் ஆவார். இனி தவத்தை நிறுத்தி வீடு திரும்பு. உமது தந்தை விரைவில் உன்னை அழைத்துச் செல்வார்.”
பிரம்மசாரிணியின் அருளால் பக்தனுக்கு தவம், துறவுத் தன்மை, வைராக்யம், நல்ல ஒழுக்கம், மனக்கட்டுப்பாடு ஆகியவை பிறக்கின்றன.
கடினமான போராட்டங்களிலும் மனம் அசையாது, கடமையிலிருந்து விலகாது நிலைத்து நிற்கும் வல்லமை கிடைக்கிறது. அம்மையின் அருளால் எப்போதும் வெற்றி உறுதி.
நவராத்திரியின் இரண்டாவது நாளில் வணங்கப்படுவள் பிரம்மசாரிணி.
அன்று சாதகர் தன் மனதை ஸ்வாதிஷ்டானச் சக்ரத்தில் நிலைநிறுத்த வேண்டும்.
அந்த சக்ரத்தில் மனதை நிலைநிறுத்தும் யோகிக்கு, தேவியின் பக்தியும் ஆசீர்வாதமும் நிச்சயம் கிடைக்கும்.
(தொடர்கிறது)
$$$
