திரு. இல.கணேசன் அவர்களுக்கு கண்ணீர் அஞ்சலி!

-வ.மு.முரளி

பாஜக மூத்த தலைவராக இருந்தவரும் நாகாலாந்து மாநில ஆளுநருமான எல்.ஜி. என்கிற திரு. இல. கணேசன் அவர்கள் (80) இன்று (15.08.2025) மாலை சென்னையில் காலமானார். அவரைப் பற்றிய சில குறிப்புகள்....

# தஞ்சையில், இலட்சுமிராகவன் – அலமேலு தம்பதியின் ஐந்தாவது மகனாக 1945 பிப்ரவரி 16இல் பிறந்தவர் இல.கணேசன். உடன் பிறந்தோர்: 5 சகோதரர்கள், 3 சகோதரிகள்.

# இளம் வயதிலேயே (25) அரசுப் பணியை (வருவாய்த் துறையில் ஆர்.ஐ. பதவி) விட்டுவிட்டு ஆர்.எஸ்.எஸ். அமைப்பின் முழுநேர ஊழியராக 1970-இல் வந்தவர்.

# ஆர்எஸ்எஸ் இயக்கம் தமிழகத்தில் வளர்ந்ததில் பெரும் பங்கு வகித்தவர்; அதற்காக தனது வாழ்வையே அர்ப்பணித்தவர்; 1975 நெருக்கடிநிலையின்போது தலைமறைவுப் போராட்டத்தில் பங்கேற்றவர்.

# ஆர்எஸ்எஸ் இயக்கத்தின் நாகர்கோவில் நகர பிரசாரக் (அமைப்பாளர்) பொறுப்பு முதல் பல்வேறு நிலைகளில் பணியாற்றியவர். 1990 வரை மாநில இணை அமைப்பாளராகப் பணி புரிந்தவர்.

# மண்டைக்காடு கலவரத்தின் போது அன்றைய முதல்வர் எம்ஜிஆரையே எதிர்த்துப் பேசி, பாதிக்கப்பட்ட ஹிந்துக்களின் தரப்பைப் புரிய வைத்து, அரசைச் செயல்பட வைத்தவர்.

# 1990 முதல் பா.ஜ.க.வில் இணைந்து பல்வேறு பொறுப்புகளில் செயல்பட்டவர். மாநில அமைப்புச் செயலாளர், தேசிய செயலாளர், தேசிய துணைத் தலைவர், மாநிலத் தலைவர் ஆகிய பொறுப்புகளில் இயங்கியவர்.

# மணிப்பூர் (2021- 23), நாகாலாந்து (2023- தற்போது வரை) மாநிலங்களின் ஆளுநராகவும் மேற்குவங்க மாநில பொறுப்பு (2022) ஆளுநராகவும் திறம்படப் பணியாற்றியவர். ராஜ்யசபா எம்.பி.யாக 2016-18இல் இருந்தவர்.

# சிறந்த இயக்க நிர்வாகி மட்டுமல்ல, பேச்சாளர், எழுத்தாளர், பத்திரிகையாளர், கவிஞரும் கூட. ‘ஒரேநாடு’ பத்திரிகையின் நிறுவனர்.

# இவர் எழுதிய பல தேசபக்திப் பாடல்கள் ஆர்.எஸ்.எஸ். அமைப்பில் பல்லாண்டுகளாகப் பாடப்படுகின்றன. அந்தப் பாடல்களை எழுதியவர் பெயரைக் குறிப்பிடுதல் சங்கத்தில் மரபு கிடையாது என்பதால், பலருக்கும் தெரிவதில்லை. சில பாடல்கள்:

புனித நன்னாளில் இன்று பூஜை செய்கிறோம்…
ஒன்னுதான் ஒன்னுதானே நம்ம நாடு தம்பி ஒன்னுதான் ஒன்னுதானே!
கல்லாக இருந்த தமிழகம் இன்றொரு வில்லாக வளர்ந்ததைக் காண்போமையா!
அந்தக் கேசவனை நாம் வணங்குவோம்…. அவர் பாதையிலே நாம் செல்குவோம்.
மலையில மகுடம் வச்சு, கடலில் பாதம் வைச்சு….

# சமயோசிதமாகவும் நறுக்குத் தெறித்தாற் போலவும் நகைச்சுவையாகவும் பேசும் சொல்வன்மை மிக்கவர்.

# கட்சி பேதம் கடந்து அனைத்து அரசியல் இயக்கங்களிலும் நண்பர்களைக் கொண்ட நனிநாகரிகர். முன்னாள் முதல்வர்கள் மு. கருணாநிதி, ஜெ. ஜெயலலிதா ஆகிய இருவரின் அன்பையும் பெற்றவர். தி.மு.க. தலைவர் திரு. மு.கருணாநிதிக்கு இவர் மீது விசேஷப் பிரியம் உண்டு.

# தேசிய சிந்தனை தமிழகத்தில் பரவ பொற்றாமரை அமைப்பை நிறுவி நடத்திய தமிழ் ஆர்வலர். மண்வாசனை, தேசிய சங்கப்பலகை ஆகிய அமைப்புகளையும் நிறுவி வழிநடத்தியவர்.

# தமிழக பாஜகவுக்கு மாநில அளவில் குறிப்பிடத்தக்க செல்வாக்கையும் மக்களிடையே ஏற்பையும் ஏற்படுத்திய தலைவர்.

தமிழகத்தில் தேசிய சிந்தனையை வலுப்படுத்திய அன்னாருக்கு நமது கண்ணீர் அஞ்சலி.

ஓம் சாந்தி.